Tréimhse an chonartha

Suas le 25 seachtaine

An Ról

Agus é ag obair d’Oifig an Choimisinéara Gaeilge, beidh an phríomhfhreagracht ag an tsealbhóir poist as an cháipéisíocht a ullmhú atá de dhíth le tacú le hearcaíocht na mball foirne a mbeidh sé mar chúram orthu beart a dhéanamh de réir phríomhaidhm an Choimisinéara – úsáid na Gaeilge sna húdaráis phoiblí a chur chun cinn agus a chosaint agus seirbhísí á soláthar don phobal nó do sciar den phobal i dTuaisceart Éireann.

Príomhfhreagrachtaí

Mar Chomhordaitheoir Earcaíochta, beidh na dualgais seo a leanas agat:

· Tacaíocht a thabhairt don Choimisinéir Gaeilge ag achan chéim den phróiseas earcaíochta.

· Leabhráin Eolais don Iarrthóir a fhorbairt d’fholúntais, atá ar ardchaighdeán.

· Cinnte a dhéanamh de go scaiptear eolas fá fholúntais ar shuíomh gréasáin agus cainéil meán sóisialta an Coimisinéara, agus fríd chláir post agus meáin chlóite cuí, agus ar ardáin earcaíochta ábhartha eile.

· Cur le feachtais earcaíochta agus gníomhaíochtaí bainteacha eile.

· Cuidiú le himeachtaí inmheánacha agus seachtracha, ionadaíocht a dhéanamh don Choimisinéir Gaeilge ag imeachtaí ar mhaithe le daoine cuí féideartha a mhealladh.

· Dul i gcomhairle le bainisteoirí agus painéil earcaíochta agus roghnúcháin ar mhaithe le lóistíocht agallaimh a chomhordú, lena n-áirítear infhaighteacht, seomraí cruinnithe, pacaí agallaimh, agus scairteanna fíorúla Teams nuair is gá.

· Cumarsáid thráthúil agus phroifisiúnta a chur ar fáil d’iarrthóirí i dtaca le agallaimh, aiseolas, agus céimeanna atá le glacadh ina dhiaidh sin.

· Córas rianaithe iarrthóirí a fhorbairt, a chothabháil, agus a uasdátú, ina bhfuil faisnéis atá cruinn agus iomlán maidir le hiarrthóirí.

· An cháipéisíocht ar fad maidir le hiarrthóirí a bhailiú agus a chomhadú go slán sábháilte.

· Tairiscintí fostaíochta agus conarthaí a ullmhú agus a eisiúint d’iarrthóirí rathúla.

· Eolas nua fá thosaitheoirí a chur in iúl do na ranna bainteacha ar mhaithe le próiseas ionduchtaithe socair a chinntiú.

· PTFanna míosúla earcaíochta a ghiniúint agus a chur i láthair.

· Aon dualgais bhreise a chomhlíonadh de réir mar a éilíonn an lucht bainistíochta.

Critéir Bhunriachtanacha

Ba chóir go mbeadh ar a laghad dhá bhliain de thaithí ag an iarrthóir rathúil ag obair i ról comhchosúil agus is fearr go mbeadh Gaeilge líofa ar a thoil aige.